काठमाडौंमा दुर्गा प्रसाई र प्रशासनबीच वार्ता, शान्तिपूर्ण आन्दोलनको तयारी

काठमाडौं, कार्तिक ९ – राजधानी काठमाडौंमा नागरिक बचाउ महाअभियान नेपाल र प्रशासनबीच आज महत्त्वपूर्ण वार्ता सम्पन्न भएको छ। काठमाडौं, ललितपुर र भक्तपुर जिल्लाका प्रमुख जिल्ला अधिकारीसहित सुरक्षा निकायका उच्च पदस्थ अधिकारी र अभियानका शीर्ष नेताहरूबीच भएको छलफलले हालै घोषित आन्दोलनका विषयमा सहमति र समझदारीका प्रारम्भिक संकेत देखिएको छ।

वार्ता काठमाडौं जिल्ला प्रशासन कार्यालयमा भएको थियो। अभियानको तर्फबाट केन्द्रीय अध्यक्ष दुर्गा प्रसाई र केन्द्रीय प्रवक्ता माधव कल्पित सहभागी थिए भने प्रशासनतर्फ तीनै जिल्लाका प्रमुख जिल्ला अधिकारी र प्रहरी प्रमुखहरू उपस्थित रहेका थिए।

छलफलमा दुर्गा प्रसाईले नेतृत्व गर्ने भनिएको आगामी आन्दोलनको स्वरूप, उद्देश्य र सञ्चालन विधिबारे प्रशासनले विस्तृत जानकारी मागेको थियो। सिडिओहरूले आन्दोलनलाई कानूनसम्मत र शान्तिपूर्ण ढंगले अघि बढाउन आग्रह गर्दै सरकारसँग संवादको वातावरण तयार पार्ने प्रतिबद्धता जनाएका छन्।

नागरिक बचाउ महाअभियानका प्रवक्ता माधव कल्पितका अनुसार, वार्ता सकारात्मक र आपसी समझदारीमा केन्द्रित रह्यो। उनले रेड मिडियालाई जानकारी दिँदै भने, “हामी शान्तिपूर्ण आन्दोलनको पक्षमा छौं। देशभरका नागरिकलाई सचेत पार्दै भ्रष्टाचार, असमानता र दमनविरुद्ध एकजुट हुन हामीले आह्वान गरेका छौं।”

छलफलमा प्रशासनले आन्दोलनका कारण जनजीवन प्रभावित नहोस् भन्ने पक्षमा जोड दिएको थियो। दुर्गा प्रसाईले भने आन्दोलन कुनै समूह वा दलविरुद्ध नभई “राष्ट्रको हित र जनताको अधिकारका पक्षमा हुने” स्पष्ट पारेका थिए।

वार्ताले संवाद र सहकार्यका ढोका खुला राख्दै आगामी दिनमा पनि नियमित समन्वय बैठक गर्ने सहमति जनाएको छ। नागरिक बचाउ महाअभियानले अब देशव्यापी तयारी तीव्र पार्ने र सबै जिल्लामा स्वतन्त्र नागरिक नेटवर्क विस्तार गर्ने घोषणा गरेको छ।