युनिकोड
मिति
रूपान्तरण 
खोज पत्रकारिता
खोज पत्रकारिता
आरबी केसी
काठमाडौं – तीनकुने घटनापछि सम्पूर्ण देश एक किसिमको अन्योलमा छ। यो त्रासदीपूर्ण घटनाले नेपाली समाजलाई गहिरो धक्का दिएको छ। यो केवल एउटा घटना मात्र होइन, सामाजिक, राजनीतिक र न्यायिक व्यवस्थाको आँखीझ्यालबाट देखिएको यथार्थ हो।
सबैले प्रश्न गरिरहेका छन् – यस घटनाको निष्कर्ष के निस्कनेछ? छानबिन प्रक्रिया कता जाँदैछ? दोषी को हो र निर्दोष को हो? हिजोका दिनमा पनि यस्ता घटनाहरू भएका थिए, तर परिणाम के भयो? जनताले न्याय पाए त? कि फेरि पनि उहीँ पुरानै खेल खेलिनेछ?
घटनापछि विभिन्न तहबाट अनेकौं प्रतिक्रिया आएका छन्। कोही एकअर्कालाई दोषारोपण गरिरहेका छन्, कोही आरोप-प्रत्यारोपमै सीमित छन्। सामाजिक सञ्जालदेखि सडकसम्म, संसददेखि बैठक कोठासम्म, सबै ठाउँमा यो विषय बहसको केन्द्र बनेको छ। तर प्रश्न उठ्छ – यो बहसले पीडितहरूलाई न्याय दिन्छ त? कि केवल राजनीतिक स्वार्थपूर्तिको अर्को खेल मात्रै बनिरहनेछ?
छानबिन र राज्यको भूमिका
तीनकुने घटनापछि केही व्यक्तिहरू प्रहरी नियन्त्रणमा छन्। विभिन्न मुद्दाहरू दर्ता गरिएका छन्। दोषीलाई कानूनी दायरामा ल्याउन खोजिएको दाबी गरिन्छ। तर, यत्तिले मात्रै न्याय स्थापित हुन्छ त? कि यो पनि अरू धेरै घटनाहरू जस्तै कागजमै सीमित हुनेछ?
मानव अधिकारवादीहरू कहाँ छन्? के उनीहरूलाई यस घटनाले कुनै फरक पारेको छैन? जनधनको क्षति भइसकेको छ, पीडित पक्षले न्याय पाउनुपर्छ। यदि पीडितलाई न्याय मिल्दैन भने, फेरि पनि उहीँ पुरानै अन्यायको श्रृंखला दोहोरिनेछ।
व्यवस्थाको नाममा भइरहेको विभाजन
नेपालमा लामो समयदेखि सत्ता, व्यवस्था, र शासनप्रणालीको नाममा जनतालाई विभाजित गर्ने प्रयास भइरहेको छ। कहिले गणतन्त्रको नाममा त कहिले राजतन्त्रको पक्ष-विपक्षमा भिडन्त मच्चाइन्छ। गणतन्त्र खतरामा छ भन्नेहरू एकातिर छन्, राजसंस्थाको पुनःस्थापनाको पक्षमा उभिनेहरू अर्कोतिर। तर, यी सबै रणनीतिहरू जनताको लागि बनाइएका हुन् त? कि केवल राजनीतिक दल र नेताहरूको स्वार्थ पूरा गर्न?
नेपाली जनता परिवर्तनको आशामा कयौं पटक सडकमा उत्रिए। जात, धर्म, वर्ग, र राजनीतिक विचारधाराको नाममा हजारौंले बलिदान दिए। तर, आज पनि शिक्षा, स्वास्थ्य, रोजगार जस्ता आधारभूत आवश्यकताहरूको सुनिश्चितता छैन। उद्योगहरू बन्द छन्, उत्पादनशील क्षेत्रहरू खस्किरहेका छन्। भ्रष्टाचार मौलाइरहेको छ, लुट्नेहरू झन् सबल बन्दै गएका छन्।
युवा पुस्ताको भविष्य
नेपाली समाजमा युवा पुस्ता गम्भीर समस्याहरूबाट ग्रसित छ। अत्यधिक बेरोजगारी, कुलत, लागुपदार्थको लत, मानसिक स्वास्थ्यका समस्या दिनप्रतिदिन बढ्दै गएका छन्। युवाहरूमा निराशा छाएको छ। उनीहरू अवसरको खोजीमा विदेश पलायन भइरहेका छन्। जसले जहाँ सक्छ, त्यहीँबाट जनतालाई शोषण गरिरहेको छ।
हाम्रो ध्यान कुन विषयमा केन्द्रित हुनुपर्छ? के हामी सधैं राजनीतिक विभाजनकै खेलमा अल्झिरहने? कि अब समृद्ध भविष्य निर्माणको यात्रामा अघि बढ्ने? हामी आफैंले निर्णय गर्नुपर्ने बेला आएको छ।
समाधान र सकारात्मक दिशा
अब समय आइसकेको छ, जब हामी समस्याको जड पहिचान गरेर समाधान खोज्नुपर्छ। नयाँ व्यवस्था खोज्नु भन्दा पहिलेकै व्यवस्थालाई सुधार्ने प्रयास गर्नु जरुरी छ। न्यायप्रणालीलाई बलियो बनाउनु, पारदर्शिता कायम गर्नु, जनताले प्रत्यक्ष रूपमा अनुभूति गर्ने परिवर्तन ल्याउनु अपरिहार्य छ।
सकारात्मक सोच र दृढ संकल्पले मात्र समाजलाई सही दिशामा लैजान सकिन्छ। आ–आफ्नो स्वार्थभन्दा माथि उठेर, एकअर्कालाई दोष दिनुभन्दा अगाडि, हामीले हाम्रा कार्यशैली सुधार्नु आवश्यक छ। केवल आरोप-प्रत्यारोपको खेल होइन, अब हाम्रै प्रयासले एउटा नयाँ युगको सुरुवात गर्न सकिन्छ।
समाजलाई सकारात्मक दिशामा लैजान, सबैको मिलेर लाग्ने बेला आएको छ। किनभने, जे रोपिन्छ, त्यही फल्छ।
आरबी केसी१९ चैत, काठमाडौं । आगामी आर्थिक वर्ष २०७८/७९ को बजेटमा स्थानीय विकास साझेदार कार्यक्रममा प्रत्येक सा ...
प्रतिक्रिया