अध्यक्ष भुवन सिंह गुरुङ नेतृत्व संकटमा : बहुमत पदाधिकारी–सदस्यको राजीनामापछि संघको भवनमा व्यवसायीले लगाए ताल्चा

काठमाडौ ।नेपाल वैदेशिक रोजगार व्यवसायी संघ अध्यक्ष भुवन सिंह गुरुङको नेतृत्वमा गम्भीर संकट देखिएको छ। संघका बहुमत पदाधिकारी तथा सदस्यहरूले सामूहिक रूपमा राजीनामा दिएपछि संघको भवनमा व्यवसायीहरूले ताल्चा लगाएका छन्।

प्राप्त विवरण अनुसार संघका प्रथम उपाध्यक्ष, महासचिव, कोषाध्यक्ष, सचिवसहित ७ जना पदाधिकारीमध्ये निर्वाचित ५ जना पदाधिकारीले राजीनामा दिएका छन्। साथै १० जना सदस्यमध्ये निर्वाचित ७ जना सदस्यहरूले पनि पदबाट सामूहिक रूपमा राजीनामा दिएका छन्। यससँगै संघको कार्यसमिति बहुमत संरचना नै बाहिरिएको अवस्था देखिएको छ।

राजीनामा दिने समूहले अध्यक्ष भुवन सिंह गुरुङ नेतृत्वको कार्यशैलीप्रति असन्तुष्टि जनाउँदै आएको बताइएको छ। उनीहरूको भनाइ अनुसार संघभित्र निर्णय प्रक्रिया एकतर्फी भएको, आन्तरिक छलफल र सहकार्य कमजोर भएको तथा व्यवसायीहरूको साझा हितलाई पर्याप्त प्राथमिकता नदिइएको कारण यस्तो अवस्था आएको हो।

उनीहरूले लामो समयदेखि आन्तरिक रूपमा समस्या समाधान गर्ने प्रयास गरे पनि अपेक्षित सुधार नदेखिएपछि सामूहिक राजीनामा दिन बाध्य भएको दाबी गरेका छन्।
राजीनामापछि परिस्थिति थप तनावपूर्ण बनेको छ।
असन्तुष्ट व्यवसायीहरूको समूहले संघको भवनमा पुगेर कार्यालयमा ताल्चा लगाएका छन्। उनीहरूले वर्तमान नेतृत्वको वैधानिक र नैतिक आधार कमजोर भएको भन्दै अब संघलाई नयाँ मार्गमा लैजानुपर्ने माग अघि सारेका छन्।

व्यवसायीहरूको एक पक्षले संघ सबै सदस्यहरूको साझा संस्था भए पनि हालको अवस्थामामा केही व्यक्तिको प्रभावमा संस्था सञ्चालन भइरहेको आरोप लगाएको छ। उनीहरूले तत्काल नयाँ निर्वाचन वा वैधानिक पुनर्गठनमार्फत संघलाई पुनः व्यवस्थित गर्नुपर्ने माग पनि गरेका छन्।

यता अध्यक्ष भुवन सिंह गुरुङ पक्षबाट भने राजीनामा र ताल्चा लगाउने कदमलाई अनुचित र भावनात्मक प्रतिक्रिया भन्दै टिप्पणी गरिएको छ। उनीहरूको भनाइ अनुसार संघभित्र देखिएको विवाद छलफल र संवादमार्फत समाधान गर्न सकिने अवस्थामा यस्तो कठोर कदम चालिनु दुर्भाग्यपूर्ण हो।

यस घटनाले वैदेशिक रोजगार व्यवसाय क्षेत्रमै गम्भीर प्रभाव पार्ने आशंका गरिएको छ। ठूलो संख्यामा व्यवसायीहरू आवद्ध रहेको यस संस्थामा उत्पन्न अस्थिरताले नीति निर्माण, समन्वय र व्यवसायिक गतिविधिमा समेत असर पार्न सक्ने अनुमान गरिएको छ।
हाल विवाद समाधानका लागि अनौपचारिक छलफल र मध्यस्थताको प्रयास भइरहेको भए पनि दुवै पक्ष आ–आफ्नो अडानमा रहेका कारण तत्काल सहमति हुने सम्भावना कमजोर देखिएको छ।

यसरी अध्यक्ष भुवन सिंह गुरुङ नेतृत्वमै देखिएको विवाद, बहुमत पदाधिकारी तथा सदस्यहरूको सामूहिक राजीनामा र संघको भवनमा लगाइएको ताल्चाले नेपाल वैदेशिक रोजगार व्यवसायी संघ गम्भीर संस्थागत संकटमा पुगेको स्पष्ट भएको छ।