साताको अन्त्यमा वर्षा र हिमपातको सम्भावना, केही स्थानमा भारी वर्षा हुने

काठमाडौँ । बङ्गालको खाडीमा विकसित हुने न्यूनचापीय प्रणालीको प्रभावले आगामी साताको अन्त्यमा देशका विभिन्न भू-भागमा वर्षा र हिमपात हुने सम्भावना रहेको मौसम पूर्वानुमान महाशाखाले जनाएको छ।

महाशाखाका मौसमविद् राजन महर्जनका अनुसार साताको सुरु र मध्यमा पश्चिमी वायुको आंशिक प्रभाव रहनेछ भने अन्त्यतिर न्यूनचापीय प्रणालीको प्रभाव देखिनेछ। त्यसका कारण पहाडी तथा हिमाली क्षेत्रमा वर्षा र हिमपातको सम्भावना बढ्नेछ।

साताको अन्त्यमा कोशी, बागमती र गण्डकी प्रदेशका हिमाली भू-भागका धेरै स्थानमा मध्यमसम्मको हिमपात हुन सक्नेछ। ती प्रदेशका थोरै स्थानमा भारी तथा एक-दुई स्थानमा धेरै भारी हिमपातको सम्भावना रहेको मौसमविद् महर्जनले बताए।

त्यस्तै, लुम्बिनी, कर्णाली र सुदूरपश्चिम प्रदेशका हिमाली भू-भागका केही स्थानमा मध्यमसम्मको हिमपात तथा एक-दुई स्थानमा भारी हिमपात हुन सक्ने अनुमान छ। साताको सुरु र मध्यमा भने सबै प्रदेशका हिमाली भू-भागका एक-दुई स्थानमा हल्का हिमपात हुन सक्नेछ।

पहाडी भू-भागमा साताको सुरु र मध्यमा सबै प्रदेशका एक-दुई स्थानमा हल्का वर्षा हुने सम्भावना छ। साताको अन्त्यमा भने केही स्थानमा मध्यमसम्मको वर्षा हुन सक्नेछ। कोशी, बागमती र गण्डकी प्रदेशका थोरै स्थान तथा लुम्बिनी प्रदेशका एक-दुई स्थानमा भारी वर्षा हुन सक्ने महाशाखाको अनुमान छ।

तराई क्षेत्रमा साताको सुरु र मध्यमा वर्षाको सम्भावना नरहे पनि अन्त्यतिर कोशी, मधेस, बागमती, गण्डकी र लुम्बिनी प्रदेशका केही स्थानमा मध्यमसम्मको वर्षा हुन सक्नेछ। सुदूरपश्चिम प्रदेशका थोरै स्थानमा पनि वर्षा हुने सम्भावना छ।

महर्जनका अनुसार साताको अन्त्यमा बागमती र गण्डकी प्रदेशका तराई क्षेत्रमा थोरै स्थानमा तथा कोशी, मधेस र लुम्बिनी प्रदेशका एक-दुई स्थानमा भारी वर्षा हुन सक्नेछ।

आगामी सातामा देशका विभिन्न भू-भागको अधिकतम र न्यूनतम तापक्रमसमेत हल्का घट्ने सम्भावना रहेको मौसमविद् महर्जनले जानकारी दिए।