सुपर टाइफुन चाम्पीको त्रास : ताइवानमा उडान रद्द, विद्यालयदेखि सेयर बजारसम्म बन्द

ताइपेई । शक्तिशाली समुद्री आँधी 'सुपर टाइफुन चाम्पी' नजिकिएपछि ताइवानमा जनजीवन प्रभावित भएको छ। आँधीको जोखिमलाई ध्यानमा राख्दै विद्यालय, सरकारी कार्यालय र सेयर बजार बन्द गरिएका छन् भने सयौँ हवाई उडान रद्द हुँदा हजारौँ यात्रु प्रभावित भएका छन्।

बीबीसीका अनुसार शुक्रबार ताइवानमा प्रवेश गर्ने अनुमान गरिएको आँधीसँगै प्रतिघण्टा १७३ किलोमिटरसम्मको वेगमा हावा चल्ने र भारी वर्षा हुने पूर्वानुमान गरिएको छ। आँधीको प्रभाव करिब ३२० किलोमिटर क्षेत्रसम्म फैलिन सक्ने भएकाले अधिकारीहरूले सतर्कता अपनाएका छन्।

ताइवानका २२ मध्ये २१ काउन्टी तथा सहरमा शुक्रबार विद्यालय र सरकारी कार्यालय बन्द गरिएका छन्। किनमेन क्षेत्रमा भने नियमित कामकाज र पढाइ सञ्चालन हुने जनाइएको छ। विश्वकै प्रमुख सेयर बजारमध्ये एक ताइवानको सेयर बजारसमेत बन्द गरिएको छ।

आँधीका कारण शुक्रबारका लागि निर्धारित २६२ आन्तरिक उडान र ६६० भन्दा बढी अन्तर्राष्ट्रिय उडान रद्द भएका छन्। रेल तथा फेरी सेवा पनि रोकिएका छन् भने केही राजमार्ग बन्द गरिएको स्थानीय सञ्चारमाध्यमले जनाएका छन्।

जापानमा पनि आँधीको सम्भावित प्रभावलाई ध्यानमा राख्दै जापान एयरलाइन्स र एएनएसहित प्रमुख वायुसेवा कम्पनीहरूले बिहीबारदेखि आइतबारसम्मका १०० भन्दा बढी उडान रद्द गरेका छन्। यसबाट कम्तीमा ११ हजार यात्रु प्रभावित हुने अनुमान छ।

आँधीको जोखिम बढ्दै गर्दा ताइवानमा एक जनाको मृत्यु भएको र ९४ जना घाइते भएको अधिकारीहरूले बताएका छन्। दक्षिणपश्चिम ताइवाननजिकैको लिउचिउ टापुमा समुद्री छालले बगाउँदा एक जनाको मृत्यु भएको हो। घाइतेमध्ये अधिकांश सडक दुर्घटना तथा लडेर चोट लागेका व्यक्ति छन्। सरकारले एक हजारभन्दा बढी मानिसलाई सुरक्षित स्थानमा सारेको छ।

ताइवानको मौसम प्रशासनका अनुसार राजधानी ताइपेईका केही क्षेत्रमा २४ घण्टाभित्र २०० मिलिमिटरभन्दा बढी वर्षा भएको छ। आँधीको प्रभाव शनिबार साँझसम्म रहन सक्ने अनुमान गरिएको छ। अधिकारीहरूले समुद्री तट र पहाडी क्षेत्रमा नजान तथा पहिरोको जोखिममा रहेका बस्तीका मानिसलाई सुरक्षित स्थानमा जान आग्रह गरेका छन्।

मौसम पूर्वानुमानअनुसार चाम्पी शनिबार उत्तरतर्फ मोडिएर जापानतर्फ अघि बढ्न सक्ने सम्भावना छ। यसले चीनको पूर्वी तटीय क्षेत्र र जापानका केही भागमा समेत प्रभाव पार्न सक्ने अनुमान गरिएको छ।

बीबीसीका अनुसार यस वर्ष पूर्वी एसियामा शक्तिशाली आँधीहरूको गतिविधि असामान्य रूपमा बढेको छ। प्रशान्त महासागरको तापक्रममा हुने परिवर्तन र एल निनो अवस्थाले पनि चरम मौसमी घटनालाई प्रभावित पार्न सक्ने वैज्ञानिकहरूको आकलन छ।