हिल्सामा खाद्यान्न र औषधिको अभाव, हिउँले बाटो छेक्दा दसैँमा घर पुग्नै मुस्किल

हुम्ला । चीनसँगको हिल्सा नाका लामो समयदेखि बन्द हुँदा सीमा क्षेत्रमा रहेका नेपाली नागरिक र सुरक्षाकर्मी खाद्यान्न, खानेपानी तथा स्वास्थ्य उपचारको अभाव झेल्न बाध्य भएका छन् । चीनतर्फको नाका खुलेर नेपाली नागरिक फर्किन थाले पनि नेपालतर्फ सडकमा जमेको हिउँका कारण घर पुग्न कठिन भएको छ ।

गत ९ गतेदेखि नाका बन्द भएपछि हिल्सामा दैनिक उपभोग्य वस्तुको अभाव चुलिँदै गएको हो । लामो समयदेखि हरियो सागसब्जी खान नपाएको स्थानीय तथा सुरक्षाकर्मी बताउँछन् । माछा-मासु उपलब्ध हुन छाडेको छ भने मौज्दातमा रहेको दालको झोलसँग खाना खानुपर्ने अवस्था आएको हिल्सा सीमा सुरक्षाचौकी (बीओपी)का इन्स्पेक्टर केदार सापकोटाले बताए ।

नाका बन्द हुँदा खाद्यान्नसँगै स्वास्थ्य उपचारको समस्या पनि गम्भीर बनेको छ । हिल्सामा स्वास्थ्यचौकी वा मेडिकलसमेत नहुँदा बिरामी परे सामान्य औषधिको भर पर्नुपर्ने अवस्था छ । सशस्त्र प्रहरीका एक जवानले लिएको सिएमए तालिम र उनीसँग उपलब्ध सीमित औषधिबाटै बिरामीको उपचार गर्नुपरेको सापकोटाले जानकारी दिए । उनका अनुसार सामान्य अवस्थामा सिटामोलजस्ता औषधिको भरमा उपचार गर्नुपर्ने बाध्यता छ ।

यसैबीच, चीनतर्फको नाका खुलेपछि बिहीबार १४४ जना नेपाली नागरिक नेपाल प्रवेश गरेका छन् । उनीहरूमध्ये केहीले हिउँ जमेको बाटो हुँदै पैदल यात्रा गर्नुपरेको छ । केही बिहीबार नै हिँडिसकेका छन् भने चीनबाट ढिलो गरी नेपाल प्रवेश गरेकाहरू शुक्रबार बिहानै यात्रा सुरु गर्ने तयारीमा छन् ।

नेपालतर्फको सडकमा जमेको हिउँ हटाउने काम भने बुधबारदेखि मात्रै सुरु भएको हो । नारा लेक क्षेत्रमा हिउँ पन्छाउन सानो स्काभेटर प्रयोग गरिएको छ । तर, मेसिनले दैनिक बढीमा एकदेखि दुई किलोमिटर मात्रै सडक सफा गर्न सक्ने भएकाले काम सुस्त गतिमा भइरहेको छ ।

सडक सफा गर्ने काममा ढिलाइ हुँदा हिल्सामा रोकिएका नागरिक थप चिन्तित बनेका छन् । यही गतिमा हिउँ हटाउने हो भने दसैँसम्म पनि घर पुग्न नसकिने चिन्ताका बीच बिहीबार एक सयभन्दा बढी नेपालीले पैदलै यात्रा सुरु गरेका छन् ।

चीनतर्फको नाका खुले पनि नेपालतर्फको सडक सहज रूपमा सञ्चालनमा आउन नसक्दा घर फर्किन चाहने नागरिकले थप कठिनाइ सामना गर्नुपरेको छ । खाद्यान्नको अभाव, स्वास्थ्य सेवाको पहुँच नहुनु र सडकमा बाक्लो हिउँ जम्नुले हिल्साको अवस्था झन् जटिल बनेको छ ।

हाल हिल्सामा सशस्त्र प्रहरीका ३५, नेपाल प्रहरीका २०, अध्यागमन कार्यालयका चार र भन्सार कार्यालयका चार गरी ६३ जना सरकारी कर्मचारी छन् । उनीहरूसँगै केही स्थानीय नागरिक पनि त्यहाँ बसिरहेका छन् ।

स्थानीय तथा सुरक्षाकर्मीले सडकमा जमेको हिउँ तत्काल प्रभावकारी रूपमा हटाएर यातायात सञ्चालन गर्न नसके खाद्यान्न र स्वास्थ्य उपचारको समस्या थप गम्भीर बन्न सक्ने बताएका छन् ।