युनिकोड
मिति
रूपान्तरण 
खोज पत्रकारिता
खोज पत्रकारिता
सम्बादाता
काठमाडौं। भोटेकोशी बाढीमा पति तथा परिवारका सदस्य गुमाएका महिलामाथि सामाजिक सञ्जालमा भइरहेको गालीगलौज र अपमानजनक टिप्पणीप्रति प्रधानमन्त्री बालेन शाहले कडा आपत्ति जनाएका छन्। पीडाको घडीमा रहेका नागरिकमाथि हुने यस्तो व्यवहारलाई उनले ‘अपराध’को संज्ञा दिएका छन्।
बाढीमा आफन्त गुमाएका तथा बेपत्ता परिवारजनको खोजी पर्याप्त नभएको भन्दै सञ्चारमाध्यममार्फत गुनासो र आक्रोश व्यक्त गरेका केही महिलाका भिडियो सार्वजनिक भएपछि सामाजिक सञ्जालमा उनीहरूमाथि अश्लील, अपमानजनक र लैङ्गिक टिप्पणीहरू बढेका थिए। यस घटनाले डिजिटल माध्यममा पीडितमाथि हुने हिंसाबारे गम्भीर बहस सुरु भएको छ।
बाढीपहिरोसम्बन्धी दैनिक जानकारी सार्वजनिक गर्दै प्रधानमन्त्री शाहले आफन्त गुमाएकाहरूको आक्रोशलाई स्वाभाविक मान्नुपर्ने बताएका छन्। उनले पीडितका भावनालाई राजनीतिक समर्थन वा विरोधको चस्माबाट नहेर्न आग्रह गरेका छन्।
“आफन्त हराएर अथाह पीडामा रहेका नागरिकहरूको आक्रोश स्वाभाविक हो। एकै क्षणमा आफ्नो संसार गुमाएकाहरूको आक्रोश, आक्रोशभन्दा बढी पीडा व्यक्त गर्ने माध्यम हो,” प्रधानमन्त्रीले उल्लेख गरेका छन्।
प्रधानमन्त्रीले पीडितमाथि हुने अनलाइन दुर्व्यवहारलाई अभिव्यक्ति स्वतन्त्रताको नाममा स्वीकार गर्न नसकिने स्पष्ट पारेका छन्। “यस संवेदनशील घडीमा पीडामा रहेका मानिसहरूमाथि अनावश्यक टिप्पणी गर्ने, हियाउने र थप पीडा दिन खोज्नेहरू अपराधी हुन्,” उनले चेतावनी दिएका छन्।
प्रधानमन्त्रीको भनाइलाई सामाजिक सञ्जालमा पीडित महिलामाथि अपमानजनक टिप्पणी गर्ने व्यक्तिहरूमाथि कानुनी निगरानी र कारबाहीको संकेतका रूपमा हेरिएको छ। यद्यपि सरकारले यस सम्बन्धमा अपनाइने ठोस प्रक्रिया सार्वजनिक गरिसकेको छैन।
यसैबीच, बेपत्ता व्यक्तिको खोजी रोकिएको भन्ने आरोपलाई सम्बोधन गर्दै प्रधानमन्त्रीले सुरक्षाकर्मीहरू अझै पनि जोखिमपूर्ण क्षेत्रमा निरन्तर खोजी तथा उद्धार कार्यमा खटिरहेको बताएका छन्। उनले उद्धारमा संलग्न सुरक्षाकर्मीहरूको योगदानको प्रशंसा गर्दै उनीहरूको मनोबल बढाउनु सबैको जिम्मेवारी भएको उल्लेख गरेका छन्।
विपत्तिमा आफ्ना प्रियजन गुमाएका नागरिकमाथि थप मानसिक आघात पुर्याउने गतिविधि रोक्न र डिजिटल माध्यमलाई जिम्मेवार बनाउनुपर्ने आवश्यकता यस घटनाले पुनः उजागर गरेको छ।
सम्बादाता
काठमाडौं । नेपाल एलपी ग्यास उद्योग संघले उद्योग, वाणिज्य तथा आपूर्ति मन्त्रीले ग्यास उद्योगीहरूप ...
प्रतिक्रिया
No approved comments yet. Be the first to comment!